الكواليس تطبيق لفرق مسرح الجامعات وصناع الأفلام القصيرة، من صنع بلال. تقدر تقرا النصوص وتلعب الألعاب من غير حساب. الصفحة دي بتقول إيه اللي بنحتفظ بيه لما تدخل بحسابك، ومين يقدر يشوفه.
بنحتفظ بإيه
- حسابك: إيميلك، واسمك، وطريقة دخولك وميعادها. كلمة السر بتتخزن متشفرة، ومحدش يقدر يقراها، حتى إحنا. ولو دخلت بجوجل، بيبعتلنا كمان عنوان صورة البروفايل بتاعتك، ومش بنعرضها في أي مكان.
- بطاقة الممثل: كل اللي بتكتبه فيها، وصورتك لو ضفتها، ولينكات التسجيلات.
- الصحاب والعروض: مين صحابك، وطلبات الصداقة المفتوحة، والعروض اللي قلت إنك هتحضرها، والكراسي ومواعيد الأوديشن اللي بتحجزها.
- الإشعارات: الردود على حجوزاتك، ولو عندك عرض، مين حجز أو لغى. كل حساب بيحتفظ بآخر 200.
- مشاهدات البطاقة: إمتى اتفتحت بطاقتك، ورقم عشوائي محفوظ في متصفح اللي فتحها، عشان الزيارة المتكررة تتحسب مرة واحدة. مش اسمه ولا عنوانه.
- عنوان الإنترنت بتاعك: اللي بتكون عليه لما تدخل أو تحفظ بطاقتك. بنحتفظ بيه 30 يوم، عشان نوقف الإساءة بس.
بنعمل بيه إيه
- بنستخدمه عشان الموقع يشتغل: ندخّلك، ونحفظ بطاقتك، ونوريها للناس، ونعرض لصحابك العروض اللي هتحضرها.
- مش بنبيعه، ومفيش إعلانات، وحساب جوجل بتاعك بنستخدمه للدخول بس.
- لو حساب خالف القواعد، المشرف يقدر يشيل حاجات من بطاقته، أو يحظره أو يمسحه، أو يحظر عنوان الإنترنت بتاعه. وحظر عنوان بيأثر على كل اللي عليه.
مين يقدر يشوفه
- أي حد داخل بحسابه: بطاقتك وصورتها، من اللينك بتاعها ومن البحث. ومن غير حساب محدش يقدر يفتحها. لو قفلت "خلّي الناس تلاقي بطاقتي" من صفحة بطاقتك، محدش هيقدر يفتحها غيرك إنت ومشرفين الموقع.
- صحابك: اسمك وجامعتك وفرقتك والعروض اللي هتحضرها. وأي حد تبعتله طلب صداقة بيشوف اسمك وجامعتك وفرقتك، حتى لو بطاقتك مخفية.
- صاحب العرض: لما تحجز أو تلغي كرسي أو أوديشن، الحساب اللي بيملك العرض أو الكاستينج ده بيشوف اسمك واللي حجزته، مع لينك لبطاقتك. لو بطاقتك مخفية، بيشوف اسمك من غير لينك.
- مشرفين الموقع: إيميل كل حساب وبطاقته، حتى المخفية، وعدد اللي فتحوا كل بطاقة، وعناوين الإنترنت الأخيرة لكل حساب.
بنحفظه فين
- Supabase بتحفظ قاعدة البيانات وصور البطاقات وبتشغّل تسجيل الدخول، على سيرفرات في أيرلندا. Vercel بتستضيف الموقع. وجوجل بتشغّل الدخول بحساب جوجل وبتبعت إيميلات الموقع، زي تأكيد الحساب وتغيير كلمة السر. الخدمات دي بتحتفظ بسجلات تقنية قصيرة، زي عناوين الإنترنت، عشان تشغّل خدماتها وتحميها.
في متصفحك
- بنحفظ دخولك، وبطاقتك لو لسه ما دخلتش بحساب، وحاجات صغيرة زي إنك شفت الجولة. مفيش كوكيز إعلانات أو تتبع.
اختياراتك
- تقدر تعدّل بطاقتك أو صورتك، أو تخفي بطاقتك، في أي وقت من صفحة بطاقتك.
- عشان تمسح حسابك، دوس "امسح حسابي" في آخر صفحة بطاقتك. ده بيمسح بطاقتك وصورتك وصحابك وقايمة عروضك على طول، ومينفعش يرجع.
عندك سؤال عن بياناتك؟ كلّم بلال